Ribeira volverá converterse no centro da moda galega

    RIBEIRA> Máis de trinta establecementos participarán na segunda edición da Semana da Moda que arranca este domingo en Ribeira. Entre os eventos máis destacados figura o desfile que se desenvolverá na praza de España o día sete ou a semana do pincho de primavera dedicada á exaltación da navalla. O gran éxito da primeira edición animou ós organizadores a celebrar a segunda semana da moda de Ribeira, promovida pola asociación de empresarios en colaboración co concello. As actividades comezarán este mesmo día cunha exposición de maniquís e fotografía de moda nos distintos establecementos participantes. Unha das principais novidades desta edición será a saída das perruquerías á rúa o xoves día cinco. O Centro Hostaleiro Aberto repite formato coa semana do pincho de primavera que este ano dedicarase á exaltación da navalla. Oito locais ofrecerán tapas con este marisco como base polo módico prezo de dous euros, entre o venres seis e o domingo oito. Os clientes que completen a ruta entrarán nun sorteo de vales degustación por valor de trinta euros. Pero sen dúbida, o gran evento da semana será a pasarela ‘Ribeira de Moda’ presentada polos actores Rafa Durán e Susana Rodríguez e coas actuacións musicais de Hugo e Yadhira e da cantante Mariú. Terá lugar o sábado a partir das oito e media da tarde na praza de España. En caso de chuvia trasladaríase á Fieteira. Durante toda a semana, os establecementos participantes repartirán rifas entre os seus clientes para participar no sorteo de vales de compra por valor de catrocentos vinte euros.

    DEIXAR UNHA RESPOSTA

    Por favor, engade un comentario!
    Por favor, engade o teu nome aquí