RIBEIRA> Douscentos deportistas de diferentes nacionalidades participan no campamento de Taekwondo Soño Olímpico que se celebra estes días no Cámping Ría de Arousa en Ribeira. Esta tarde recibiron a visita da secretaria xeral para o Deporte quen se sumou ós adestramentos da man da elite internacional deste deporte. Nesta novena edición, o Campionato Internacional Soño olímpico consolidouse xa como un dos campus de taekwondo máis destacados neste deporte. Desta volta, os participantes poderán compartir experiencias con mestres da talla de Eva Calvo, Jaouad Achab ou Gabriel Mercedes, No campamento, que se desenvolverá durante toda a semana nas instalacións do cámping Ría de Arousa, en Oleiros, participan máis de douscentos deportistas de diferentes nacionalidades, divididos en dous grupos: un de iniciación e outro de perfeccionamento. Esta tarde contaron cunha convidade especial que se sumou ós adestramentos como unha participante máis. A secretaria xeral para o deporte quixo expresar así o apoio do departamento que dirixe co club Natural Sport, organizador do evento, polo seu esforzo na promoción do taekwondo dende a base. A intención dos organizadores é seguir medrando nun futuro. Co fin de aumentar a capacidade das instalacións, a xerencia do cámping comprometeuse a habilitar un módulo máis para albergar máis participantes.
Inicio Barbanza - Muros - Noia
