O SALNES> Dende este mércores pódese visitar no Hospital do Salnés a escolma de debuxos gañadores da oitava edición do concurso infantil de carteis sobre a doazón e o transplante. Trátase dunha iniciativa na que participan rapaces e rapazas de toda Galicia que busca concienciar xa dende a infancia e adolescencia da importancia dun xesto vital como é a doazón. A área sanitaria de Pontevedra e O Salnés pode presumir de datos récord: en 2025 captáronse once doantes que acabaron cedendo 34 órganos.
Estes debuxos teñen un gran significado. Son as propostas que se presentaron á oitava edición do concurso de carteis sobre doazón e transplante. Dende este mércores, as persoas que se acheguen ao Hospital do Salnés poden contemplar as distintas propostas gañadoras, chegadas dende toda Galicia.
O concurso está organizado pola Axencia Galega de Doazón de Órganos e Sangue. Nesta oitava edición participaron ao redor de 600 rapaces e rapazas, de primaria e secundaria, de distintos centros educativos de Galicia. Entre as propostas premiadas, esta de Noa, unha alumna dun colexio pontevedrés. Dende a Asociación de Doantes de Órganos de Vigo, que colabora, destacan a implicación do alumnado.
As charlas son outra das claves do traballo de concienciación entre os máis novos sobre a importancia de doar. Profesionais da área sanitaria tamén adoitan impartir conferencia polos colexios.
O coordinador de transplantes da área sanitaria de Pontevedra e Salnés destaca a solidariedade da xente á hora de doar órganos.
A área de Pontevedra, así e todo, ten a singularidade de que non fai transplantes de órganos, só extracción.
Porén, a área sanitaria de Pontevedra e O Salnés pode presumir de ter batido o seu propio récord de doazóns. En 2025 captáronse once doantes que acabaron cedendo 34 órganos, 19 córneas, ósos e vasos sanguíneos a 26 receptores.
