BARBANZA> A xornada de folga tivo un seguimento desigual. Maior incidencia na industria onde algunhas empresas se viron obrigadas a parar ante a presenza de piquetes. Pola contra, o comercio e a hostalería operaron con normalidade en boa parte dos concellos da comarca.
Normalidade no Barbanza durante a xornada de folga. A presenza de piquetes nos polígonos de Xarás e A Tomada tanto a pasada noite como a primeira hora desta mañá afectou á actividade dalgunhas fábricas.
Aínda así, non se reportaron incidentes e a maioría das empresas optaron por reorganizar a produción. No sector do pequeno comercio e a hostalería a incidencia da folga apenas se deixou sentir aínda que na praza de abastos da capital barbanzá tan só abriron a metade dos postos.
No centro de Ribeira a maior parte de establecementos permaneceron abertos con peches puntuais nalgún hipermercado que optou por baixar o enreixado ante a presenza de piquetes informativos.
No que respecta ó sector do mar, a lonxa operou con normalidade aínda que a actividade viuse notablemente reducida polo temporal.
