A música foi a protagonista da fin de semana en Pontevedra. Por quinto ano consecutivo celebrábase o Certame provincial de Bandas de Música no Pazo da Cultura da cidade. Vinte agrupacións participaron nun concurso consolidado e de gran prestixio para o mundo da música na provincia. As banda xuvenil de Torroso, a Banda de Música Bandeira, a Unión Musical de Meaño e a Banda de Silleda foron as gañadoras desta edición.
Arredor dun milleiro de músicos pasaron esta fin de semana por Pontevedra: o motivo era a celebración do quinto Certame provincial de Bandas de Música que se celebraba no Pazo da Cultura. O concurso estivo dividido en catro sesións segundo o número de integrantes. Na sección terceira, de 40 a 45 músicos, os gañadores foron a Banda Xuvenil de Torroso seguida da Agrupación Musical Lira de San Miguel de Oia, a Banda Xuvenil de Chapela, a Banda de Música Reveriano Soutullo, a Banda de Música Unión de Guláns, a Banda Municipal de Valga e a Banda de Música Cultural de Mondariz. Na sección segunda, de 45 a 60 músicos, o xurado outorgou o primeiro premio e mención de honra da Caixa de Galicia a Banda de Música Recreativa e Cultural de Bandeira. O segundo premio foi para a Banda de Música Belas Artes, outro segundo premio o acadou a Agrupación Musical de Belesar e os terceiros foron para a Banda de Música Popular de Rubiós, a Banda de Música xuvenil de Xinzo e a Agrupación Musicocultural de Ribadumia. Na sección primeira, de 60 a 80 músicos, o primeiro premio foi para a Unión Musical de Meaño. O segundo clasificado foi a Agrupación Atlántica de Matamá e o terceiro a Agrupación Musical de Vincios. Por último, na sección especial: de 80 a 115 músicos, actuaron tres bandas: o primeiro premio foi para a Banda Municipal de Música de Silleda, o segundo para a Banda da Escola de Música de Beade e o terceiro para a Unión Musical de Valladares.
