Curtos de animación para os nenos de Vilagarcía

    Esta mesma mañá, o Auditorio de Vilagarcía acolleu a proxección dos curtos de animación do certame audiovisual 2005 do Liceo Casino. Uns douscentos nenos puideron desfrutar do pase especial de cinco curtametraxes organizado para eles.

    Collidos da man e acompañados dos maestros chegaban esta mesma mañá ó Auditorio de Vilagarcía os nenos de dous dos colexios da vila. Uns douscentos cativos que sentaron caladiños antes do comezo da proxección dos curtos. En total cinco historias elixidas de entre o total de curtos de animación presentados á trixésimo terceira edición do certame e que incorpora por segundo ano consecutivo este pase especial para nenos.

    As curtametraxes das que puideron desfrutar os nenos foron a valenciana ‘O soño de Pedro’, as coruñesas ‘Alistán, o demo oveiro’ e ‘A escola das areas’ e as madrileñas ‘Tadeo Jones’ e ‘A fonte’.