VILAGARCÍA> Antes da comparecencia conxunta da oposición era o goberno local de Vilagarcía o que se pronunciaba sobre todo este asunto. O executivo acusa ó resto de partidos de preferir que as cousas saían mal antes de que haxa un novo centro de saúde en Vilagarcía. Sobre a polémica do informe policial sobre a accesibilidade na zona onde se vai construir ese ambulatorio, a tenente de alcalde Tanía García recoñece que se equivocou ao asegurar que si se lle enviara ao Sergas. Di que foi un erro, pero advirte que non mentiu.
A oposición saíu á palestra esta tarde, pero a resposta do goberno local de Vilagarcía xa se producía esta mañá. A tenente de alcalde, Tania García, era a encargada de lamenta-la actitude dos grupos da oposición en todaT a polémica que xurdiu co emprezamento do centro de saúde.
E no centro do furacán o famoso informe policial sobre a accesibilidade da parcela da antiga comandancia. Foi a propia Tania García a que asegurou que ese documento xa estaba en mans do Sergas, algo que negan dende o Servizo Galego de Saúde. Hoxe a socialista asegurou que a orde estaba dada e que ela pensaba que xa fora executada.
E defende que o informe non observa problemas de tráfico para o ambulatorio na Mariña. García argumenta que o problema do paso dos trens de mercadorías vai estar sempre presente, xa que atravesa a cidade.
Ademais, a tenente de alcalde salienta a boa sintonía entre concello, Xunta e Autoridade Portuaria para a creación do novo centro de saúde. Pon en entredito, en especial, o papel do PP local, que esta tarde escenificaba a súa unión nesta causa co resto de partidos da esquerda. A socialista amosábase sorprendida pola unión preguntando se os populares vilagarcían están do lado de Fajardo, voceiro de Vilagarcía en Común, ou de Comesaña, Conselleiro de Sanidade.
