BOIRO > Un cachalote de enormes dimensións apareceu varado na praia boiresa de Carragueiros. O animal, foi avistado nun primeiro momento por varios particulares, así como tamén por persoal da Confraría de Pescadores de Cabo de Cruz, que informaron da súa presenza ó Grupo Municipal de Intervención Rápida. Ata o lugar achegouse tamén unha unidade móbil da Coordinadora para o Estudo dos Mamíferos Mariños, CEMMA, que se fixeron cargo do cetáceo.
A primera hora da mañá do xoves membros do Grupo Municipal de Intervención Rápida de Boiro desprazáronse ata a praia de Carragueiros alertados, por varios particulares e membros da Confraría de Pescadores da localidade, da existencia dun cachalote que permanecía varado na costa e inicia-las labores de arrastre do cetáceo. Ata o lugar tamén se desprazou unha unidade móbil da Coordinadora para o Estudo dos Mamíferos Mariños co fin de recoller mostras do animal.
Segundo Xosé Antonio Martínez, encargado de varamentos do CEMMA, cada ano vai aumentando o número de varamentos nas costas galegas. Os estudosos desta cuestión apuntan ós temporais como principais causas que explican este incremento, sen esquecer a presión da pesca sobre estas especies, que en ocasións quedan atrapadas en aparellos de captura.
Tamén a redución de alimento ou un incremento das enfermidades redundan nunha maior mortandade destes animais. O avanzado estado de descomposición do animal, que xa chegou ó areal boirés practicamente desfeito fixo complicado o rescate, empregándose dúas palas excavadoras de grandes dimensións para poder ser retirado da praia. Ademais, a este inconvinte sumóuselle tamén o mal estado do mar, que nalgunhas ocasións dificultaba tamén o traballo dos operarios municipais.
Redacción Salnés
