BARRO > O stress é un dos males maiores que sofre hoxe en día a nosa sociedade. Para combater este e outros problemas de índole psicolóxico e emotivo, principalmente, naceu ANDREA: unha curiosa asociación pioneira en España que ten nos burros ós seus máximos aliados.
Se alguén lles di que os burros lles poden axudar a curar o stress pódelles resultar estraño. Pois nada máis lonxe da realidade e ANDREA é proba diso. A Asociación Nacional para a Defensa, Recuperación e Estudo Terapéutico da Raza Asnal ten a súa sede en Barro e alí coidan a burros que logo participan en terapias individuais e de grupo.
Nestes momentos ANDREA conta con varios rapaces de entre 7 e 14 anos que acoden ás terapias nas que, a través do animal e coa axuda de terapeutas especializados, dan solución a hiperactividade, depresión ou fracaso escolar.
A asociación, que naceu oficialmente en agosto do ano pasado, contaba nos seus comezos 
con cinco burros. Agora son preto de 20 os que conviven tras seren recollidos algúns que estaban abandoados. Dende a asociación lamentan non poder ter máis, sobre todo por falta de espazo e de axudas para a manutención por iso teñen un programa de adopción de animais.
A excelente acollida que está a ter a actividade desenvolvida por esta asociación pioneira en España está a contribuír especialmente á sensibilización da xente cun animal que forma parte da historia de Galicia.
Redacción Salnés
