BARBANZA/SALNÉS > Cinco confrarías galegas entre as que se atopan ás de Pobra do Caramiñal, O Grove e Pontevedra veñen de presentar un proxecto dun macrocriadeiro e unidades de preengorde co que pretenden dar resposta á carencia de semente de bivalvos que presenta actualmente o sector. A iniciativa, baixo a denominación ‘Sementando futuro no marisqueo galego’, conta co asesoramento do Centro de Investigacións Mariñas e o apoio da Asociación Galega de Mariscadores e da Axencia de Desenvolvemento do Litoral de Galicia.
Un total de cinco confrarías galegas: Pobra do Caramiñal, o Grove, Pontevedra, Cangas e Barallobre, así como a Cooperativa Cíes Artesanal son as promotoras desta iniciativa coa que pretende aumenta-la produtividade dos bancos marisqueiros e rematar dunha vez por todas coa carencia existente de semente.
A súa intención pasa fundamentalmente por crear un macrocriadorio, cunha ubicación aínda por definir, e varias unidades de preengorde que poderían estar distribuídas polas rías de Vigo, Pontevedra, Arousa e Ferrol co fin de mellora-la calidade da semente e garanti-lo subministro, xa que na actualidade a oferta das empresas é insuficiente.
A macrohatchery tería capacidade para criar uns 200 millóns de unidades e serviría para todo tipo de moluscos, aínda que estaría destinada fundamentalmente a ameixa fina e babosa.
Os impulsores desta iniciativa baixo a denominación ‘Sementando futuro no marisqueo galego’, pretenden a implicación da Xunta de Galicia para o seu financiamento e están a espera de manter unha xuntanza en breve coa propia Conselleira de Pesca, Carme Gallego, para explicarlle de primeira man as características do proxecto.
Redacción Barbanza
