BOIRO > A Organización de Consumidores e Usuarios vén de analizar, na súa publicación mensual, a calidade das augas dun total de 80 praias de toda España. Desafortunadamente, unha das que non superan o exame é a praia de Barraña en Boiro, catalogada pola OCU como non apta para o baño. Lonxe de dar importancia a esta diagnose, o goberno local entende que os resultados expostos pr esta organización privada carecen de rigor posto que as análises foron realizadas en xullo do pasado ano.
Do total das oitenta praias analizadas pola OCU en toda España un 70 por cento supera con éxito o exame mentres que doce do total, entre elas a de Barraña, presentan contaminación nas súas augas. A organización de Consumidores e Usuarios chega a desaconsellar o baño neste areal, recomendación que non merece ningún crédito por parte do executivo local posto que as análises que levaron a esta conclusión foron realizadas hai preto dun ano sen dar aviso ningún ó concello.
O concelleiro de Turismo, Manuel Velo, defendeu a calidade das augas da costa boiresa baseándose nas análises realizadas periodicamente pola Consellería de Sanidade que este ano outorgou catro bandeiras azuis ó municipio boirés.
Da mesma opinión son os bañistas e usuarios da praia de Barraña que non entenden as recomendacións da OCU posto que, a pé de praia, comprobaron o bo estado en que se atopan as súas augas.
Dende o concello envíase unha mensaxe tranquilizadora a tódolos veciños insistindo en que a OCU constitúe unha organización privada cuxos métodos non merecen a mesma credibilidade que a Xunta de Galicia que garante a total seguridade para os bañistas neste areal.
Redacción Barbanza
