POBRA > O executivo pobrés ten previsto iniciar o vindeiro mes de setembro as obras de saneamento, abastecemento de auga e mellora da pavimentación na baixada do alto de Cabío ó campo de fútbol da Alta. A actuación, incluída no Plan de Obras e Servizos da Deputación da Coruña para este ano 2006, será realizada pola empresa OYS Noroeste. O presuposto das obras ascende a máis de 85 mil euros.
O alcalde da Pobra do Caramiñal, Isaac Maceiras, informou da realización de varias obras dentro do Plan de Obras e Servizos da Deputación Provincial da Coruña para este ano 2006. A primeira delas, que vén de ser adxudicada á empresa OYS Noroeste por un presuposto de máis de 85 mil euros, consistirá basicamente na mellora do saneamento, o abastecemento de auga e a pavimentación na baixada do alto de Cabío ó campo de fútbol da Alta.
Segundo sinalou o rexedor local esta obra terá como obxecto solucionar a problemática actual existente nesta zona e garantir coa creación e a renovación das infraestruturas, uns servizos básicos axeitados ás necesidades dos veciños.
Dentro do POS 2006, o executivo pobrés ten previsto proceder en breve á adxudicación das obras do proxecto de mellora do acceso, pavimentación e construción de novas beirarrúas na zona da Atalaia e no Colexio Salustiano Rey Eiras, cun orzamento de máis de 49 mil euros.
Redacción Barbanza
