RIBEIRA > Ó mal inicio da campaña marisqueira hai que sumar a frecuente aparición de vertidos…
… que danan os bancos naturais. Nesta ocasión, trátase da construción dun edificio na zona do Touro, en Ribeira, que provocou o arrastre de barro ata o banco marisqueiro da zona. Os mariscadores ribeireses xa se puxeron en contacto cos promotores da obra para advertir das posibles consecuencias negativas deste vertido.
Os mariscadores decatáronse xa hai tempo da presenza dunha capa de lodo no banco natural do Touro procedente das obras dun edificio no paseo marítimo. As fortes chuvias provocan que o barro procedente do movemento de terras sexa arrastrado ata o mar prexudicando a actividade extractiva. A pesar dos reiterados avisos da agrupación de mariscadores e as denuncias por parte de Portos e o Seprona, a empresa constructora non foi quen de solventar o problema ata que esta semana os mariñeiros se presentaron na obra para esixir o cese inmediato dos vertidos. A medida de presión tivo efecto e, segundo explicou o presidente dos mariscadores ribeireses, José Antonio Pérez, xa non se rexistra ningún vertido na zona. O colectivo agarda que a solución adoptada polos promotores da obra sexa definitiva. De non ser así, os mariscadores non dubidarán en paraliza-la construción se aparecen de novo os vertidos.
Ata o momento, non se coñecen os danos provocados no banco do Touro aínda que este tipo de vertidos soe ser bastante perigoso posto que o fango se pousa no fondo mariño matando o sustrato e o marisco. Para avaliar as perdas, a Confraría vai examinar o estado do fondo posto que ata o momento xa se constatou a presenza dalgún bivalvo morto na zona.
Redacción Barbanza
