DODRO > Un bo número de persoas asistiu no Pazo de Lestrove á presentación do novo candidato do PP á alcaldía de Dodro, Valentín Alfonsín Somoza.
O novo candidato estivo arroupado polo presidente do PPdeG, Alberto Núñez Feijoo, así como tamén por varios alcaldes e candidatos das comarcas do Barbanza e do Sar. A presentación serviu ademais como despedida do actual alcalde de Dodro, Fernando Vila Brión, despois de case 28 anos ininterrompidos á fronte do concello.
O novo candidato do PP de Dodro tivo tamén palabras de eloxio para o alcalde saínte, ó que agradeceu ter confiado nel para encabeza-la lista do Partido Popular ás vindeiras eleccións municipais.
Durante a súa intervención tivo tempo tamén para falar do seu programa no que se incluirá a realización do tan ansiado PXOM ou a construción dun polígono industrial.
Pola súa banda, Alberto Núñez Feijoo agradeceulle ó actual alcalde, Fernando Vila Brión, o traballo realizado ó longo das sete lexislaturas que estivo á fronte do concello de Dodro. Ademais o líder dos populares galegos desexoulle grandes éxitos ó novo candidato, ó que definiu como o mellor preparado.
Redacción Barbanza
