Portos de Galicia mellorará os portos da Pobra e Palmeira

    BARBANZA > Portos de Galicia vén de sacar a licitación dúas novas obras na comarca: a ampliación do pantalán de Palmeira e o acondicionamento das instalacións náutico-deportivas da Pobra.

    A Consellería de Política Territorial a través de Portos de Galicia vén de anunciar no Diario Oficial de Galicia a licitación e o acondicionamento das instalacións portuarias nos portos de Palmeira en Ribeira e a Pobra do Caramiñal. Dúas obras que deberán iniciarse de inmediato.

    obrasportos_200_200807.jpgEn Palmeira a inversión prevista polo ente autonómico ascende ós 520 mil euros, que irán destinados á ampliación dos actuais pantaláns, así como á ordenación da dársena e á reubicación dos puntos de amarre existentes, coa retirada da pasarela actual, o portalón e os trens de fondeo. As obras terán un prazo de execución de seis meses.

    A outra actuación prevista por Portos no Barbanza será realizada nas instalacións náutico-deportivas da Pobra. Os traballos, que terán un custe de máis de 332 mil euros, consistirán básicamente no acondicionamiento das actuais instalacións coa retirada do pantalán de formigón do peche na zona sur, substituindo o actual pilote e todo o material deteriorado. As obras terán un prazo de execución de catro meses.

    Redacción Barbanza