RIBEIRA > Unha serie de novos roubos nas embarcacións amarradas no porto ribeirés vén de xerar a preocupación do colectivo mariñeiro.
O sector pesqueiro de Ribeira volve estar en alerta despois da última vaga de roubos rexistrada durante a pasada semana en varias embarcacións atracadas nos pantaláns do porto ribeirés.
Nesta ocasión, os ladróns levaron consigo diversos sacos de marisco, que os produtores deixan amarrados ás embarcacións para mante-las capturas vivas. Trátase de perdas moi impiortantes, que se veñen sumar á desaparición doutro material como roupas de auga e útiles de pesca.
A pesar da gravidade da situación, nesta ocasión as perdas están a ser menores que hai uns meses cando tamén se rexistraron diversos episodios de roubos no porto ribeirés. Daquela, os ladróns chegaron a levar consigo depósitos de gasolina, así como os motores e as hélices dalgunhas embarcacións e incluso dispositivos electrónicos de navegación, altamente valorados.
Máis vixilancia
O malestar existente entre os membros da confraría antes estes acontecementos levou ó presidente a convocar unha xuntanza para decidir que medidas son precisas para disuadir ós ladróns. A directiva do pósito plantexa a posibilidade de contratar servizos de vixilancia, tanto polo día como pola noite.
Mentres tanto, a confraría ribeiresa segue á espera da colocación da cámaras de video na zona portuaria, que xa foran comprometidas por Portos de Galicia, sen que ata o momento se teña instalado ningún dispositivo de vixilancia.
Redacción Barbanza
