Este mes darán comezo tamén as obras de rexeneración de Barraña

BOIRO > O Xefe da Demarcación de Costas anunciou o inminente comezo das obras do paseo marítimo de Escarabote, …

… presupostadas nuns 800 mil euros. A actuación, cun prazo de execución de once meses, prevé a recuperación ambiental do bordo litoral dende a zona do porto ata Punta Estivada.

Segundo sinalou a pé da obra o Xefe da Demarcación de Costas, Rafael Eimil, que acudiu a Escarabote acompañado de varios membros do executivo local, a actuación prevista polo Ministerio de Medio Ambiente centrarase no acondicionamento de accesos, na recuperación dos seus recursos naturais e na mellora de equipamento en todo o borde litoral. As obras, que serán levadas a cabo pola empresa OVISA abarcarán unha franxa de costa de aproximadamente 500 metros de lonxitude e un ancho de seis metros de media.O tenente-alcalde de Boiro, Xoán Xesús Ares, amosou a súa satisfacción polo inicio das obras do proxecto de recuperación do borde litoral en Escarabote que permitirá a construción do tan ansiado paseo marítimo na zona. Aínda así, a consecución desta actuación non foi sinxela, segundo el, e houbo que chegar a acordos con numerosos veciños afectados. As obras  afectarán a un total de 50 propietarios, entre os que se atopan tamén varias vivendas.Esta non será a obra máis importante que o Ministerio de Medio Ambiente ten previsto desenvolver en Boiro nos próximos meses. Así Rafael Eimil anunciou tamén o inicio inminente da tan ansiada rexeneración da praia de Barraña. Unhas obras que terán un custe duns seis millóns de euros e que posibilitarán un aporte de aproximadamente 300 mil metros cúbicos de area.

Rafael Eimil aludiu tamén a outras actuacións que están pendentes en Boiro como é o caso dos proxectos de rexeneración e recuperación ambiental do río Coroño e Esteiro.

REDACCIÓN BARBANZA