Aparece afogado en Coroso un veciño de Ribeira

RIBEIRA > Unha tráxica nova espertaba esta mañá á cidade de Ribeira. Un veciño da localidade de 39 anos aparecía flotando …

… ó redor das dúas da mañá na praia de Coroso, nas proximidades do cámping. Ó parecer e segundo informaron fontes policiais o falecido podería estar practicando pesca submariña.O corpo sen vida de Álvaro O.S., de 39 anos e veciño do lugar das Saíñas no concello de Ribeira foi atopado sen vida ó redor das dúas desta madrugada, flotando sobre as augas na praia de Coroso, nas inmediacións do camping alí existente. Ó parecer e segundo os datos ós que tivo acceso esta redacción o falecido podería estar practicando pesca submariña. Os seus familiares ó observa-la tardanza do mozo, emprenderon a súa búsqueda, dando como resultado a tráxica nova. Despois de dar aviso tanto á Policía Local coma a Policía Nacional, que se achegaron de seguido ata o lugar do sinistro, foi alertada tamén unha ambulancia asistencial e o médico de urxencias do Punto de Atención Continuada de Ribeira, que confirmaron o seu falecemento.Os datos sobre as posibles causas da morte de Álvaro O.S., que deixa muller e dúas fillas, son polo de agora escasos, ó estar sendo investigados pola Policía Nacional de Ribeira e o propio Xulgado de Garda.

Este non foi o único sinistro que se produciu na comarca do Barbanza durante a xornada de hoxe. Ás nove e vinte, aproximadamente, desta mañá, a Central de Coordinación de Chamadas do 061-Galicia recibiu tamén un aviso por un accidente laboral por caída dun tellado ocorrido no concello de Boiro, concretamente no lugar de Brión. Para atender á vítima, un mozo de 29 anos, que responde ás iniciais de F.A.O.F., Urxencias Sanitarias de Galicia enviou ata o lugar do sinistro unha ambulancia asistencial. Unha vez alí o persoal médico atendeu ó xoven, ó que se lle diagnosticaron diferentes policontusións. Despois dunha primeira valoración e asistencia, o accidentado foi trasladado ó Hospital da Barbanza de Ribeira.

REDACCIÓN BARBANZA