VILAGARCÍA > Vitoria histórica do Extrugasa por 85-64 ante as suízas do Sdent Sierre; histórica porque constitúe o primeiro triunfo do Extrugasa en Europa, pero non polo xogo amosado.
Os 21 puntos de diferencia final non reflicten as dificultades polas que pasaron as de Isaac Fernández durante o encontro, sobre todo na primeira metade.
Ata o minuto 15 as helvéticas mantivéronse por diante no marcador, acadando unha máxima renda de nove puntos. Tras un tempo morto, as vilagarciás atáronse os machos en defensa e foron quen de darlle a volta ó partido antes do descanso, grazas á actuación de Sara Gómez dende o perímetro e María Asurmendi na dirección do equipo.
A segunda parte foi máis de cara; pronto acadaron rendas superiores ós 15 puntos que mantiveron ata o final, pese ó esforzo voluntarioso das suízas.
Entre as boas novas do encontro, as importantes aportacións das últimas fichaxes. Kiesha Brown está cada vez máis adaptada e amosa partido a partido a calidade que ten. Onte fixo 16 puntos.
Marina Kress pola súa banda, apunta boas maneiras e onte fixo xa o seu primeiro dobre-dobre con 12 puntos e 11 rebotes, traballando duramente baixo os aros.
Entre os asistentes, no palco de autoridades, estiveron presentes o tenente alcalde Xosé Castro Ratón e a Directora Xeral para o Deporte, Marta Souto.
Sen tempo apenas para o descanso, o Extrugasa prepara hoxe o seu próximo encontro de Liga. Será este sábado ante o Seu D’Urgel, en Fontecarmoa a partires das 7 e media da tarde.
Redacción Salnés