POBRA > A empresa COSAPLAG iniciou os traballos de desinsectación no museo Valle-Inclán, para acabar coa praga de térmites que afecta ó inmoble.
É un proceso longo, custoso e complicado o que ten por diante a Torre de Bermúdez para frear a acción das térmites nas dependecias museísticas e evitar que afecten á colección de fondos. Nel conta coa inestimable axuda da Dirección Xeral de Turismo que concedeu unha subvención de doce mil euros para acometer o proxecto de desinfección e prevención que se iniciou esta mesma semana.
Na primeira fase que se está a levar a cabo, os traballadores da empresa COSAPLAG están a taladrar o perímetro do edificio para a inxección dun veneno específico contra estes insectos efectivo durante un prazo de tres anos.
Tratamento preventivo
Unha vez rematada, quedan por diante dúas novs fases: a desinfección con gas que obrigará ó peche e precintado do museo entre sete e dez días e un tratamento preventivo mediante a colocación de cebos de parede.
Debido a esta desafortunada incidencia, o ritmo de traballo estes días no museo é frenético xa que os traballadores están a embalar tódolos fondos para evitar que resulten afectados polo fosfuro de alumnio.
Así, a praga de térmites obrigou igualmente a paralizar os traballos de colocación de fiestras iniciados tralas riadas do pasado ano que obrigaron a rehabilitar boa parte do edificio.
{flowplayer}barbanza/termitesvalleinclan.flv{/flowplayer}
Redacción Barbanza
