RIBEIRA> Os adxudicatarios das vivendas sociais xa están un paso máis preto de mudarse ás súas novas casas despois do sorteo celebrado este luns.
Expectación, nervios e moita emoción. Ese era o ambiente que se respiraba no conservatorio municipal de Ribeira onde se celebrou o sorteo dos distintos pisos entre os adxudicatarios das vivendas sociais de Xarás.
{flowplayer}barbanza/sorteovivendassociais.flv{/flowplayer}
Agora, en función dos metros cadrados e da renda de cada familia será preciso elaborar un estudo económico para establecer a contía a pagar. Unha vez aprobado, os novos inquilinos que accederán ás vivendas en réxime de aluguer dispoñen dun mes para ingresa-la fianza e unha vez realizados tódolos pagos asinaranse os contratos e recibirán as chaves das súas casas.
Estímase que para aqueles que elixiron a opción de compra venda, soamente tres, o proceso se demore un pouco máis xa que depende tamén das entidades financieiras aínda que dende a Xunta agardan que non se prolongue máis aló do mes de maio.
Situación precaria
Será entón cando chegue un dos momentos máis agardados para Emilia, Cristina, Carlos, Juan, Silvestre e así ata completar unha longa lista de nomes, cada un coa súa propia e difícil historia.
A partir de entón, Susana e a súa familia poderán trasladarse dende a caravana na que viven na actualidade. Tamén a vida cambiará para a familia de Germán nunha casa na que os seus fillos disporán de dormitorio propio e para Inma e os seus catro fillos que poderán por fin acceder á vivenda pola que tanto levan loitado.
A sorte xa decidiu que portal e planta corresponde a cada un; aínda que uns quedaron máis contentos ca outros co resultado do sorteo todos se consideran afortunados e agardan con impaciencia o día en que poidan comezar unha nova vida na súa casa.
Redacción Barbanza