RIBEIRA> Un numeroso grupo das Amas de Casa de Ribeira visitou esta mañá as instalacións de Congalsa na Pobra. Ademais de coñecer máis de preto os procesos de produción da empresa, as usuarias da entidade tiveron ocasión de degustar as últimas especialidades que vén de sacar ó mercado.
As instalacións da empresa Congalsa, na Pobra, recibiron esta mañá unha visita moi especial. Un grupo de socias das Amas de Casa de Ribeira desprazáronse ata a fábrica para coñecer máis de preto o proceso de produción das distintas gamas de produtos que elabora a compañía.
A visita rematou cunha degustación dalgunhas das últimas especialidades que Congalsa vén de sacar ó mercado, presentadas recentemente en Conxemar.
A visita, na que participaron máis de 20 usuarias, supón un paso máis na estreita colaboración de Congalsa coas Amas de Casa de Ribeira, entidade á que vén apoiando en numerosos eventos e a través de diversas iniciativas dende hai moitos anos.
