BOIRO> O PP de Boiro fíxose eco das queixas veciñais sobre presuntos vertidos de augas fecais en montes comunais. De confirmarse estas prácticas, denuncian os populares, suporían un importante risco para a saúde pública.
Xa hai meses que o Partido Popular tiña coñecemento por parte de varios veciños do baleirado de presuntamente augas fecais por parte da empresa responsable do mantemento da rede municipal de sumidoiros. A pesar de ter atopado algún resto que apuntaba a vertidos non foi ata o de agora cando se animaron a denuncialo publicamente ó contar cun documento gráfico.
O PP esixirá explicacións ó goberno local para aclarar se autorizou ou é coñecedor destas prácticas que os populares consideran intolerables.
Pola súa banda, dende o concello solicitaron un informe para aclarar a orixe destas sustancias aínda que, á espera de confirmación, apuntan que non se trata de ningún vertido.
