VILAGARCÍA> A organización do torneo deu a coñecer esta mañá o nome da selección que completará o cartel deste ano. Italia únese a España, Francia e Alemania e loitará polo título nun torneo eminentemente europeo.
O Comité Organizador da Vilagarcía Basket Cup anunciou esta mañá a presencia da selección italiana na decimosexta edición do torneo. A azurra únese deste xeito a España, Alemania e Francia, completando así un cartel de auténtico luxo no que estará representado o mellor do baloncesto europeo.
Italia xa estivo presente na edición de 2009 na que deixaron un grato recordo. Acadou un meritorio cuarto posto, caendo precisamente ante España na final de consolación. Nesta ocasión presentarán en Vilagarcía grandes talentos e proxectos de futuras estrelas do baloncesto como Francesco Vecchia, Aristide Landi ou Francesco Candussi.
Por outra banda, a Basket Cup deu a coñecer os horarios dos partidos que se disputarán no pavillón de Fontecarmoa. O sistema de competición será de liguiña todos contra todos e os encontros celebraranse ás 18:00 e ás 20:00 quedando a final para o día 23 de abril ás 20:30 do serán.
Ademais, a organización xa ten confirmados os 36 equipos participantes na Future Stars que se desenvolverá no pavillón 2 de Fontecarmoa e no Rúa Castelao, un torneo para categorías infantil, cadete e junior.
En referencia ó torneo da base, a organización está a ter problemas para complacer a tódolos equipos que desexan participar xa que este ano redúcese a presencia de equipos. Ademais, a inscripción na Vilagarcía Basket Camp vai a bo ritmo e en apenas dez días case medio centenar de rapaces xa reservaron a súa praza.
Redacción Salnés
