A CORUÑA> Para levar a cabo o Plan, cun orzamento de dez millóns de euros, solicitará o apoio económico do Fondo Europeo de Desenvolvemento Rexional.
{flowplayer}barbanza/planeficienciaenerxetica.flv{/flowplayer}
O presidente da Deputación, Salvador Fernández Moreda, presentaba esta mañá en rolda de prensa as características deste plan que o organismo provincial pretende poñer en marcha nos concellos da provincia con menos de 20 mil habitantes. Segundo el este programa permitirá aforrar ata un 40% do gasto enerxético municipal en alumeado público, que supón máis da metade da factura eléctrica dos concellos e reducir as emisións de CO2 á atmosfera.
Entre as actuacións contempladas no dito Plan prevense accións encamiñadas á mellora da eficiencia dos alumeados públicos como a substitución das lámpadas antigas por outras máis eficientes, a instalación de reloxos astronómicos que acendan e apaguen a iluminación coa saída e a posta do sol ou a incorporación de fontes de obtención de enerxía solar fotovoltaica para o alumeado de paseos e monumentos situados fóra de núcleos urbanos. O PEACE II contemplará ademais a substitución das bombas de impulsión dos sistemas de abastecemento e saneamento municipais, que xeran un elevado consumo eléctrico, e o aproveitamento da enerxía solar térmica na instalacións de auga quente dos polideportivos municipais.
Accións sensibilización e formación técnicos municipais
Por outra banda, segundo explicou o propio Moreda, o programa PEACE II incluirá accións de sensibilización social sobre a importancia do aforro e a eficiencia enerxética e de formación de técnicos municipais nesta materia.
Redacción Barbanza
