Ribeira transfórmase nun escenario de cine

    rodaxesinbad_100.jpgRIBEIRA> Corrubedo e Palmeira acollen a rodaxe da longametraxe ‘Sinbad’ de Antón Dobao na que participan coñecidos actores galegos.

    Cando se cumpren cen anos do nacemento do escritor Álvaro Cunqueiro, unha das súas obras, Si o vello Sinbad volvese ás illas, que tamén celebra o medio século dende a súa publicación, terá unha versión cinematográfica. O director Antón Dobao adaptou o texto da novela para transformala nunha longametraxe que estes días se está a rodar en distintas localizacións no concello de Ribeira.

    {flowplayer}barbanza/rodaxesinbad.flv{/flowplayer}

    Concretamente durante esta semana o equipo de rodaxe traballa en Corrubedo. Os escenarios escollidos: as praias, o porto, o faro e distintas rúas do pobo onde se emprazan as vivendas dos protagonistas. Nos próximos días, as localizacións serán no mercado e no porto de Palmeira e na praia de Cabio.

    Producido por Ficción, e ca colaboración da Axencia Galega das Industrias Culturais e o concello de Ribeira, o filme está protagonizado por coñecidos actores galegos, entre outros, Xosé Olveira ‘Pico’, Sara Casasnovas, Mariña Sampedro, Luís Zahera, Antonio Durán ‘Morris’ ou Mariana Carballal.

    Segundo adiantou o rexedor ribeirés, estase a valorar a posibilidade de que a presentación oficial da longametraxe, prevista para o outono, sexa en Ribeira.

    Redacción Barbanza