O Club de Remo Cabo de Cruz segue a acadar importantes éxitos, confirmando ó excelente momento que atravesan os seus deportistas. A tripulación masculina venceu, nas augas da ría de Vigo, o Campionato Galego Absoluto de trainerillas. Desde a primeira virada marcaron diferenzas respecto a Samartolomeu e non fallaron en ningunha das acometidas dos locais, gañando a regata por tres segundos de marxe. O título de campións galegos xa o acadaron no 2006 e no 2007. Tamén foi destacable a actuación dos xuvenís do mesmo club, os cales lograron un meritorio 2º posto a tan só un segundo dos Mecos do Grove.
