POBRA> Este próximo sábado, 15 de agosto, celebrarase na Pobra do Caramiñal a vixésimo quinta edición da Festa da Bici, organizada pola concellaría de Deportes. A principal novidade deste ano é que a actividade terá un carácter solidario e cada participante terá que achegar un quilo de alimentos non perecedeiros no momento de realizar a súa inscrición. Estes alimentos serán entregados a Cáritas que posteriormente os distribuirá entre as familias mais necesitadas do municipio. Como en anos anteriores na Festa da Bici poderán participar todas as persoas que o desexen, sen importar a idade. O único requisito será levar bicicleta e casco. A actividade dará comezo ás dez e cuarto da mañá na Praza Alcalde Segundo Durán. Haberá dous percorridos, un para menores de oito anos e outro para maiores desa idade. Tódolos participantes entrarán nun sorteo de regalos doados por diferentes entidades comerciais da localidade. Na organización da actividade, ademais da concellaría de Deportes, colaboran o Club de Mountain Bike A Portela, o Motoclub Sin Frenos e a Peña Ciclista As Raíñas.
Inicio Deportes
