RIANXO> Os cento oitenta rapaces que participan no campamento urbano ‘Boga, boga o mar’ de Rianxo visitaron esta mañá as instalacións do museo do mar e da Aula Activa do Mar. Alí tiveron ocasión de realizar un percorrido pola cultura marítima da vila achegándose ós oficios tradicionais relacionados co mar. Coñecer o traballo dos carpinteiros de ribeira, dos redeiros ou dos mariscadores. Achegarse ó interior dunha embarcación pesqueira ou afondar na historia desta vila mariñeira. Isto e moito máis é o que ofrece o Museo do Mar de Rianxo a través de visitas como a que veñen de realizar os rapaces do campamento urbano da vila. Os técnicos do museo elaboraron un percorrido adaptado ós pequenos, máis didáctico e centrado nos aspectos da propia vila posto que se trata de nenos rianxeiros. Ademais das visitas escolares, o museo e a aula activa do mar ofrecen durante todo o ano a posibilidade de visitar os seus fondos e, mediante reserva previa, tamén se realizan percorridos guiados para grupos. Así que xa saben. Para os que se acheguen ata Rianxo non hai mellor forma de empaparse na súa cultura mariñeira que recalando neste excepcional museo.
Inicio Barbanza - Muros - Noia
