BARBANZA> Portos de Galicia investirá trece millóns de euros en infraestruturas durante o 2018. Destaca a dotación de pantaláns en varios peiraos arousáns así como os proxectos de remodelación do bordo portuario en Noia e Portosín. O presidente de Portos de Galicia compareceu no Parlamento para dar conta dos orzamentos do ente público de cara ó vindeiro exercicio. O investimento en infraestruturas portuarias ascenderá ata os trece millóns de euros, un noventa por cento máis que no pasado ano. Entre as principais actuacións destaca a creación de novos pantaláns nos portos do Xufre, Cabo de Cruz e Vilaxoán así como a ampliación dos existentes en Porto do Son e Portosín. En canto ás obras para o acondicionamento de espazos portuarios, José Juan Durán destacou os proxectos de remodelación do bordo marítimo de Noia e de Portosín así como o vial de acceso ó porto de Ribeira. Acometeranse ademais noutros portos galegos a mellora de defensas e puntos de amarre, o reforzo dos abrigo ou obras de dragaxe dos fondos. Por último, o titular do departamento autonómico referiuse ó proxecto de sinalización dos polígonos de bateas que en 2018 recibirá douscentos mil euros. Trátase dun plan plurianual que conta cun investimento total de oitocentos cincuenta mil euros.
Inicio Barbanza - Muros - Noia
