PONTEVEDRA> A nova comisaria da Policía Nacional de Pontevedra afronta o cargo poñendo o foco de atención no cidadán. Esta mañá recibiu ós medios de comunicación para falar sobre as liñas que rexerán o seu traballo á fronte do corpo.
A principal preocupación de Estíbaliz Palma serán os cidadáns, é dicir, intentará combater os delitos que contribúen a empeorar a súa calidade de vida ou a súa percepción de seguridade.
Prestarase especial atención ás vítimas relacionadas coa violencia de xénero, para o que é fundamental concienciar á sociedade de que hai que denunciar.
Tamén falou sobre os delitos tecnolóxicos, que están a experimentar un crecemento notable.
Neste ámbito o importante é, segundo a comisaria, a prevención e a formación.
Sobre o tráfico de drogas, tema policial relevante na provincia, resaltou que a competencia da Comisaría Provincial se centra na pequena e mediana escala, xa que para outro tipo de operacións existe o Grupo de Resposta Especial para o Crime Organizado.
Sobre a petición por parte dos sindicatos dun maior número de efectivos, recoñeceu que hai déficit de persoal, coma ocorre no resto de España, e que isto se nota máis nas poboacións pequenas.
Esta falta de medios é a que impide a creación de novas unidades policiais coma a demandada UPR.
Tras estas primeiras semanas de toma de contacto cos axentes e os departamentos que dirixirá, a nova comisaria visitará o resto de dependencias da provincia das que será máxima responsable.