VALGA> Conmoción e incredulidade no concello de Valga. A parroquia de Cordeiro espertaba este día dun forte golpe: un novo caso de violencia machista que deixa tres mulleres falecidas. Un home mataba a tiros a primeira hora da mañá a súa exparella, a súa excuñada e a súa sogra. Tras darse á fuga do lugar dos feitos, foi detido pola Garda Civil no concello de Ames.
Sandra, Alba e María Elena. Son as tres últimas vítimas que deixa a violencia machista. Eran a exparella, excuñada e exsogra do presunto asasino. José Luis Abet, de 45 anos e natural de Padrón, asasinounas a tiros esta mañá na vivenda que compartira con Sandra no lugar de Carracido, na parroquia valguesa de Cordeiro.
O presunto asasino disparou primeiro contra Sandra, que se atopaba ao lado do coche. Dentro agardaban os dous fillos da parella, de 7 e 4 anos, para ir ao colexio. Xa na finca da vivenda, tirou contra a súa exsogra e a súa excuñada. As tres eran naturais da parroquia de Campaña.
Os pequenos non sufriron danos físicos e foron atendidos por equipos de psicólogos.
Tras cometer o triple crime, o home fuxiu. Foi detido despois nas inmediacións da vivenda da súa nai, no municipio coruñés de Ames. Alí vivía dende a separación, hai preto de dous anos, e estaban divorciados dende xaneiro do ano pasado, segundo fontes do Tribunal Superior de Xustiza de Galicia. Nin na subdelegación do goberno nin no concello de Valga había denuncias previas.
Este é o segundo caso de violencia machista que se rexistra no concello de Valga no que levamos de ano. O pasado mes de marzo, era María Jesús Guimarey a asasinada polo seu marido, que despois se quitou a vida.
Dende o 2003, 25 mulleres foron asasinada en Pontevedra. Este ano xa hai 40 vítimas de violencia machista en toda España, dúas delas en Galicia.