PONTEVEDRA> A cultura galega lanzou a través das redes sociais un novo movemento. Baixo o lema “Non nos canceles”, o sector fai un chamamento a toda a sociedade para evitar que se suspendan máis actividades. Unha iniciativa da que xa forman parte a actriz Bea Campos, o FICBueu ou a Sala Karma de Pontevedra.
#Nonnoscanceles. Baixo este cancelo, a cultura galega fai un chamamento a todas as administracións e empresas para evitar que se sigan suspendendo eventos na nosa comunidade. Os traballadores e artistas deste sector piden que se busquen novas datas para celebrar as actuacións xa que as consecuencias económicas no caso de cancelalas, serían inmensas. Unha iniciativa á que xa se sumou, o xerente da Sala Karma de Pontevedra.
O sector cultural é un dos máis afectados por esta crise do coronavirus. Sobre todo polas preguntas que están aínda sen resolver. Ninguén sabe cando volverán a abrir as súas portas ou cando poderán volver a subirse ao escenario. Unhas preguntas que xeran incerteza entre os traballadores e os empresarios. En canto ao futuro da Sala Karma de Pontevedra, Marcos Rivas asegura que é moi negro.
Marcos Rivas é promotor de diferentes actividades culturais na cidade. Eventos como o Galegote Rock ou o Surfing The Lérez. O primeiro está xa cancelado e, en canto ao segundo, Rivas asegura que farán todo o posible para que se celebre e, ademais, tratarán de involucrar nel a todos os pontevedreses.
Porque cando esta crise remate que, sen dúbida, rematará, a cultura estará sempre ao noso carón para facernos gozar cos mellores libros, coas mellores películas, coas mellores exposicións ou coa mellor música.
