PONTEVEDRA> O teito do Mercado de Abastos de Pontevedra converterase nunha obra de arte. A segunda capa proxectada polo concello para mellorar o illamento do edificio será unha gran vidreira artística deseñada por Miguelanxo Prado. Estará composta por máis de 500 pezas cun tamaño de 10 por 20 metros, simulando o fondo do mar.
Estas serán as imaxes que recibirán a visitantes e clientes dende o teito do Mercado de Abastos de Pontevedra. Trátase dunha vidreira de 200 metros que cubrirá os lucernarios dos dous patios interiores do edificio.
A imaxe leva a sinatura do ilustrador coruñés Miguelanxo Prado. Estará composta por máis de 500 pezas, e trátase dunha reivindicación da Galicia litoral.
Esta vidreira forma parte da obra para mellorar o illamento da praza de abastos. Comporá un segundo filtro suspendido da estrutura. Tamén se substituirá o vidro laminado da primeira capa, que carecía de protección solar.
En canto aos prazos, a intervención xa está en marcha nun dos patios que permanece pechado e que, calculan dende o concello, estará listo no mes de xaneiro. A obra ao completo estará finalizada no primeiro trimestre de 2027.
Os traballos de impresión dos cristais comezarán proximamente. Correrán a cargo dunha empresa de Lalín.











