O Concello de Pontevedra presenta “Mañá”, o himno da recuperación da cidade

PONTEVEDRA> O Concello de Pontevedra presentou hoxe o tema “Mañá”. Unha canción na que colaboraron máis dunha vintena de artistas da Boa Vila e que naceu co obxectivo de converterse no himno da recuperación da cidade.

“A alarma resoa na boca do artista, dun mundo que torna a unha forma distinta”. Así comeza “Mañá”. Unha canción impulsada pola concellería de Xuventude de Pontevedra e na que se uniron diferentes artistas da Boa Vila. Este tema busca converterse no himno da recuperación da cidade.

A composición do tema estivo a cargo de de dous rapaces de 16 e 18 anos. Mariña Paz, a vocalista de Furious Monkey House, e Thomas Argibay Walker. Ademais, a canción contou tamén coa colaboración de artistas como Soulmacklein, Checho Malkeda ou Malecho. Pola súa banda, Gonzalo Maceira e Iago Lorenzo encargáronse da produción musical.

Co obxectivo de facer chegar esta canción a todos os pontevedreses, o goberno municipal celebrará mañá ás 19:00 horas un encontro virtual con todos os artistas que formaron parte do proxecto.

Esta conversa emitirase en directo no perfil de Youtube do Concello.