PONTEVEDRA> A carreira Ponle Freno volverá percorrer Pontevedra. O vindeiro 24 de xuño a cidade acollerá esta cita solidaria, que busca tamén concienciar da importancia da seguridade viaria. Todos os cartos que se recaden coas inscricións destinaranse este ano ao proxecto de Aulas Activas de Stop Accidentes. O obxectivo dos organizadores é superar os 1200 inscritos de anos anteriores.
Pontevedra repetirá o vindeiro 24 de xuño como sede dunha das carreiras do circuito Ponle Freno. Haberá dúas modalidades: un trazado de 5 quilómetros e outro de 10, que percorrerán o centro da cidade.
A campaña cumpre 15 anos sen perder de vista o seu obxectivo: concienciar sobre a importancia da seguridade viaria. Tamén mantén o seu espírito solidario. Todo o recadado destinarase nesta edición a STOP ACCIDENTES.
Dende o concello pontevedrés, o alcalde puxo en valor a relación da cidade co deporte. Miguel Anxo Fernández Lores animou tamén a toda a veciñanza a participar, destacando a importancia da aposta pola seguridade viaria.
As inscricións xa están abertas na web oficial do evento. Os interesados poderán anotarse ata o propio sábado 24 de xuño pola mañá.
