PONTEVEDRA> Pontevedra continuará sen orzamentos para este 2024. Non houbo sorpresas e as contas do goberno local volveron ser rexeitadas polo pleno. O alcalde Miguel Anxo Fernández Lores non conseguiu renovar a confianza depositada hai seis meses nel pola corporación municipal. O PP votou ‘non’ á cuestión de confianza presentada polo rexedor. O PSOE optou pola abstención.
Non houbo sorpresas. A proposta de orzamentos do goberno do BNG de Pontevedra para este 2024 tampouco saíu adiante no pleno extraordinario celebrado esta mañá. Unha sesión na que se debateu a cuestión de confianza proposta polo alcalde unida á aprobación destas contas.
A sesión iniciou cunha intervención do alcalde. Fernández Lores alertou do panorama desolador que, asegurou, supón para a cidade non ter orzamentos para este 2024.
O alcalde explicou que recorreu a esta cuestión de confianza por atoparse nunha situación excepcional. E é que cifran en 11’8 millóns de euros os cartos que hai que bloquear para asumir as obrigas contables ao prorrogar, un ano máis, o orzamento de 2022.
O pleno estivo marcado pola tensión non só no escenario, tamén entre o público. Representantes do funcionariado municipal e dos vendedores ambulantes seguiron a sesión, que foi interrompida en varias ocasións. Ao remate, seguiron con tambores e bucinas ao grupo municipal do BNG dende o Teatro Principal ata o edificio de Michelena 30.
