PONTEVEDRA> Doce mozos e mozas de todo o Estado están a participar no primeiro campo de voluntariado itinerante no Camiño Portugués. Chámase ‘Botarse ao Camiño’ e no seu marco os participantes viven a experiencia nunha dobre vertente: como peregrinos, por unha banda, e como dinamizadores e informadores desta ruta, pola outra. Hoxe cubriron a etapa Pontevedra-Santiago de Compostela.
Este grupo de mozos e mozas está a percorrer o Camiño Portugués pero faino cunha dobre vertente. Son peregrinos como os demais, pero tamén son dinamizadores e informadores desta ruta a Santiago.
Son os participantes na primeira edición de ‘Botarse ao Camiño’, un campo de voluntariado que busca revalorizar a riqueza natural de Galicia e, ao mesmo tempo, concienciar sobre o coidado do medio ambiente. Tendo o Camiño, ademais, como eixo vertebrador.
Os rapaces son doce e chegan dende sitios tan diferentes como Bueu ou Bilbao. Ademais de ofrecer apoio aos peregrinos axudan ao mantemento do Camiño recollendo o lixo que atopan nos seus percorridos.
A experiencia encaraba hoxe a súa fase final, coa etapa Pontevedra-Santiago de Compostela, pero a intención da Xunta de Galicia é que ‘Botarse ao Camiño’ chegue para quedarse.