CAMBADOS> A aldea de Nadal de Cambados cambia de localización e este ano vaise montar na Praza do Concello. O goberno local decidiu trasladar este decorado de Fefiñáns a este novo emprazamento para evitar posibles danos nesa zona patrimonial. Responden así ás demandas da Asociación de Amigos de Fefiñáns, que denuncia o uso excesivo da emblemática praza para eventos masivos e que implican o uso de maquinaria pesada.
Cambados non renuncia a un dos seus principais reclamos dos últimos anos polo Nadal, pero con cambios. A popular aldea de Fefiñáns abandona este emprazamento con rumbo á Praza do Concello. Alí xa comezou a súa montaxe.
O colectivo de amigos de Fefiñáns advirte do abuso que se estaba a facer desta praza. Segundo calculan o ano pasado estivo ocupada máis de 100 días, impedindo gozar do espazo patrimonial. Din que iso implica tamén a entrada de maquinaria pesada ou a montaxe de estruturas que poden acabar danando o conxunto. Algo que por sorte non pasou aínda, pero que queren evitar agora dende o concello trasladando a aldea de Nadal.
Esta medida levará tamén ao concello a valorar no futuro o traslado doutras actividades que ata o de agora se estaban a facer en Fefiñáns. Iso si, xa avanzan que algunhas manteranse alí por falta de emprazamentos alternativos.
O que teñen claro no concello é que a Aldea de Nadal deste ano volverá gustar a pequenos e maiores. Avanzan que terá novidades e que, malia que poida parecer o contrario, o cambio de praza non suporá unha redución do seu tamaño.
