BOIRO > O PP de Boiro vén de amosar o seu desacordo ante o Plan Parcial de Barraña presentado polo executivo local. Os populares consideran que a actuación proposta polo goberno imposibilita a construcción de baixos comerciais na zona co que suporía un perxuízo para o desenvolvemento económico de Boiro. Así mesmo, o grupo popular non está de acordo co deseño das edificacións nin da rede viaria.
O Plan Parcial de Barraña segue a xerar discrepancias entre o goberno de Boiro e a oposición. O grupo municipal do PP vén de rexeita-lo proxecto, ó que califican de “aberración urbanística e económica para Boiro”.
Segundo o seu voceiro, Xoán Xosé Dieste, o proxecto non contribuirá a abrir Boiro ó mar senón todo o contrario posto que permite a construcción de grandes muros que impedirán as vistas á ría.
Así mesmo, alegan que diminúe a edificabilidade, imposibilitando a creación de baixos comerciais. Isto influiría negativamente sobre o desenvolvemento económico do municipio, afectando tanto ó sector comercial como ó turístico.
Os populares tampouco consideran axeitada a construcción de soportais nos baixos dos edificios xa que cren que se converterán en focos de suciedade, residuos e marxinación.Tampouco están de acordo coa planificación viaria ó considerar que se producirán frecuentes colapsos no tráfico.
Segundo Dieste, o plan do goberno non beneficia en absoluto ós cidadáns senón que unicamente traerá vantaxes para as empresas amigas do tripartito encargadas de executa-la obra.
Redacción Barbanza
