RIANXO > A Vicepresidenta primeira da Mesa do Parlamento e deputada do BNG, Tereixa Paz, xunto cos deputados Beatriz Sestayo do PsdeG-PSOE e Xesús Palmou do PP, desprazáronse esta mañá ata o colexio de educación primaria Brea Segade de Taragoña.
A razón da súa visita non era outra que cumprir cun compromiso adquirido cos alumnos de 5º e 6º de Primaria deste centro educativo hai unhas semanas durante unha excursión organizada á Camara galega na que solicitaron a atención dos políticos ás deficiencias que presenta o colexio.
Co obxectivo de corresponder á visita e satisfacer deste xeito as demandas dos propios alumnos do colexio de educación primaria Brea Segade de Taragoña os deputados do BNG, Tereixa Paz, PsdeG-PSOE Beatriz Sestayo e PP Xesús Palmou desprazáronse ata o centro ediucativo.
Alí acompañados polo director e varios profesores foron percorrendo as distintas instalacións, supervisando as principais carencias que presenta actualmente o colexio.
Despois duns vintedous anos dende a súa construción o edificio non sufriu ningunha actuación, existindo importantes deficiencias no mesmo, como é o caso da falla de mobiliario na maioría das aulas, así como o problema de humidades e filtracións de auga e o pintado tanto interior coma exterior.
Os tres políticos comprobaron de primeira man as deficiencias do colexio e sinalaron que van facer todo o que estea nas súas mans para solucionalas.
A visita ó centro educativo coincidia tamén coa Festa de Nadal dos alumnos.
Redacción Barbanza
