POBRA > A resposta do executivo da Pobra ante as declaracións do BNG nas que acusaban ó voceiro popular de enganar á corporación no pleno do pasado xoves non se fixo agardar. Ricardo Lago sostén que as enmendas presentadas ó convenio dos funcionarios sí foran pactadas cos representantes sindicais polo que teñen total validez.
Ricardo Lago respondía ás acusacións formuladas pola voceira nacionalista, Rosana Pérez, deixando claro que en ningún momento existiu engano por parte do goberno. O portavoz do grupo popular sostén ademais que na comisión informativa xa se explicara a necesidade de introducir certas correccións no texto, se ben non se utilizou o termo exacto de enmenda.
Os populares consideran polo tanto que a aprobación do convenio foi totalemnte válida xa que tódolos puntos foran consensuados previamente. Non obstante, se os representantes sindicais e dos traballadores o solicitan, o executivo expresou a súa intención de reunirse con eles para pactar tódolos termos nos que aínda existan discrepancias.
Redacción Barbanza
