PONTEVEDRA > Un total de 40 empresas e entidades da provincia de Pontevedra recibiron o distintivo de calidade turística outorgado pola Deputación de Pontevedra. O presidente do organismo provincial, Rafael Louzán, foi o encargado de entregarlles os diplomas acreditativos e emprazounos a seguir apostando polo sector.
O Padroado de Turismo Rías Baixas entregou os distintivos do Plan de Calidade a unhas corenta empresas e entidades da provincia de Pontevedra. Neste proxecto participaron 64 empresas de diversos sectores do turismo, restauración, hostalería, museos, actividades de ocio, axencias de viaxe e oficinas de turismo.
Entre as corenta recoñecidas destaca a rede de Museos de Cambados, con distinción para o museo do Viño, a Casa de Cabanillas, o Pazo de Torrado, a Casa do Pescador e o Muíño da Seca. Tamén a oficina de turismo recibiu un diploma. A Casa Museo de Valle Inclán de Vilanova ou as oficinas de turismo de Rías Baixas, do Grove e de Poio tamén recibiron o distintivo de calidade turística. No Salnés tamén se recoñeceu a calidade de establecementos como os hoteis Villa Juanita, Nuevo Vichona, Nuevo Ástur e os Hesperia da Toxa, a empresa de actividades acuáticas Galicia Marine Chárter e o restaurante Yayo Daporta.
Na entrega destes distintivos estivo o presidente da Deputación Rafael Louzán, que destacou o papel de Pontevedra como referente nacional de calidade turística e emprazou ó sector a seguir traballando nesta liña.
Redacción Salnés
