VILAGARCÍA > Sálvora tamén podería pasar a ser de dominio público. O Parque Nacional Illas Atlánticas ten en carteira esta xestión pero de momento dálle prioridade á compra de Cortegada. O presidente do Padroado Illas Atlánticas, Manuel Vidal, estivo hoxe na Autoridade Portuaria de Vilagarcía, que lle prestará as súas instalacións no faro de Sálvora.
O Padroado do Parque Nacional Illas Atlánticas afirma que ten intención de que a Illa de Sálvora sexa de uso público. Dáse a casualidade que na ría de Arousa se atopan dúas das illas incluídas neste espazo protexido menos accesibles ó público en xeral. No caso de Cortegada o proceso de compra xa está en marcha, tal como anunciou no seu día a Xunta. O mesmo se quere facer con Sálvora pero o Parque Nacional quere ir ós poucos e dálle prioridade a Cortegada. Así o asegurou hoxe en Vilagarcía Manuel Vidal, presidente do Padroado do Parque Nacional Illas Atlánticas.
Esta mañá asinou un convenio de colaboración co presidente da Autoridade Portuaria, Jesús Paz, precisamente para poder usar as instalacións que o porto ten no Faro da Illa de Sálvora. O Parque Nacional instalará unha estación meteorolóxica para vixilancia e control científico no faro. A Autoridade Portuaria tamén lle deu permiso ó Padroado para realizar en Sálvora un inventario das bolboretas nocturnas deste espazo protexido. En carteira está a posible instalación no faro dunha base permanente científica do Parque.
Redacción Salnés
