BARBANZA > Tralo chamamento feito o pasado mes de xullo polo Centro de Transfusións de Galicia ante as escasas reservas de sangue, o nivel de doazóns en Galicia segue a medrar. Este xoves achegámonos ata unha das unidades móbiles que diariamente se desprazan por distintos concellos para coñecer de preto o seu traballo.
Cando un doante se achega ata unha destas unidades móbiles o primeiro que fai o persoal sanitario é verificar se cumpre tódolos requisitos para doar. É dicir, ter entre dezaoito e sesenta e cinco anos e non padecer ninguna enfermidade. A continuación, o médico encargado da unidade entrevista ó doante para comprobar os seus datos persoais e entregarlle un impreso que deberá asinar conforme autoriza a extracción do sangue. É fundamental inxerir algún alimento antes de acudir a doar e durante o proceso aconséllase beber algún líquido, por iso calquera hora do día é boa para doar.
Unha vez se accede ó apartado de doazóns, o persoal de enfermería prepara a zona de punción e comeza a extracción dos preto de 500 mililitros de sangue, un proceso que durará apenas uns minutos. O sangue extraído nestas unidades móbiles será trasladado logo ó Centro de Transfusión de Galicia para ser analizado e preparado para as transfusións.
Cada xornada pasan por estas unidades unha media de 40 persoas, aínda que o pasado mes de xullo, cando as reservas de sangue baixaron de xeito alarmante, os volume de doantes disparouse. Desde o Centro de Tranfusión de Galicia indican que o mellor é que as doazóns se fagan de xeito regular, xa que para manter unhas reservas estables a nivel galego precísase unha media de cincocentas doazóns ó día.
Trala doazón de sangue a persoa pode seguir realizando as mesmas tarefas que fai a diario, o único que se aconsella evitar son actividades extraordinarias que poidan provocar mareos ou desmaios.
Redacción Barbanza
