Boiro recupera o saber tradicional como atractivo turístico

    paseateconnos_100_051006.jpgBOIRO > O departamento de Servizos Sociais do concello de Boiro realizou un balance moi positivo do seu Programa ‘Paséate con Nós’ desenvolvido durante o verán.

    ¿Quen mellor que as persoas maiores para transmitir a riqueza cultural e histórica dos pobos? A raíz desta idea xurdeu a iniciativa ‘Paséate con Nós’ na que cinco persoas exerceron de guías turísticas durante o verán. O programa que se desenvolveu ademais de en Boiro nas parroquias de Abanqueiro, Bealo, Cabo de Cruz e Cespón dividiuse en varias áreas temáticas. Así cada un dos participantes encargouse de explicar ós visitantes as peculiaridades dun lugar turístico ou dunha costume do pobo como foron a igrexa de Santa Baia, o muíño de Bealo, o fenómeno da emigración a través do centro de Neixón, as características do muíño de Bealo ou a vella arte da cesteiría en Abanqueiro.paseateconnos_200_051006.jpg

    A valoración por parte dos participantes non puido ser máis positiva. Ademais de sentirse últiles todos resaltaron o divertido da actividade que contribuíu a fomenta-las relacións sociais, chegando a xurdir relacións de amizade entre guías e visitantes.

    Dende o concello tamén se realizou unha valoración moi satisfactoria do programa que, ademais de propiciar a participación da terceira idade no desenvolvemento turístico, permitiu obter unha referencia dos sectores máis punteiros e atractivos para os visitantes. Neste sentido, o departamento de turismo seguirá as liñas trazadas por este proxecto que pon de manifesto o gran interese que esperta o sector marítimo nun concello costeiro, sen descoidar por outra banda, os recursos paisaxísticos e patrimonias que ofrece o municipio boirés.

    Redacción Barbanza