PONTEVEDRA > PSOE e BNG conseguen incluír nos Presupostos Xerais do Estado máis de 60 millóns de euros dirixidos a Galicia.
Proxectos como a conexión de Pontevedra coa A-52, a circunvalación de Pontevedra, a remodelación do nó do Pino ou os tramos do Eixo Atlántico Pontevedra – Vigo e Pontevedra – Ourense, acaban de ver incrementada a súa dotación no proxecto dos presupostos xerais do Estado para 2007. O Goberno central recolleu así a práctica totalidade das propostas realizadas polo grupo municipal do PSOE en Pontevedra. A voceira socialista Teresa Casal amosouse satisfeita xa que nestes presupostos ‘si se detecta boa vontade de facer máis cercana Pontevedra, de colocala realmente no mapa’.
Moitas destas achegas incluíronse nun paquete de emendas presentadas conxuntamente polo PSOE e BNG no Congreso, que foron agregadas ó proxecto dos presupostos. Trátase de actuacións por algo máis de 61 millóns de euros, que xunto con outras achegas acaban incrementando as contas xerais do Estado a preto de 1.800 millóns de euros. Para o PSOE é unha cifra que garantirá a modernidade dos equipamentos e infraestructuras en Galicia. Por iso, o deputado do PSOE no Congreso Antón Louro lamenta que ‘o PP siga sin estar á altura das circunstancias’, xa que segundo sinalou estes presupostos duplican o investimento que viña facendo o PP para Galicia.
O proxecto continuará a súa tramitación parlamentaria ata mediados de decembro. Alomenos o primeiro envite foi salvado co apoio de grupos como o PNV, Coalición Canaria, Chunta Aragonesista e, sobre todo, do BNG. Para Antón Louro, o dobre acordo presupostario (no Goberno Central e na Xunta) ‘é unha mostra inequívoca da boa sintonía e estabilidade do bipartito galego’.
Redacción Salnés