NOIA > A Confraría de Noia reiniciou a súa campaña extractiva tras varias semanas de inactividade …
… debido á caída dos prezos do marisco despois do Nadal. A volta ó traballo está a resultar bastante positiva debido fundamentalmente ó incremento dos prezos do marisco, aínda que os mariscadores están a ter serias dificultades para consegui-los topes.
A volta á actividade dos mariscadores do pósito noiés está a resultar bastante positiva, xa que se observa unha lixeira melloría no volume de capturas rexistrado antes do peche das súas concesións. Neste sentido actualmente mantéñense abertos a práctica totalidade dos bancos marisqueiros da ría, a excepción dunha parte na que hai sementada ameixa e berberecho pequeno, así como a zona das lagoas.
Prezos elevados
No primeiro día de traballo entre as lonxas do Testal e do Freixo subastáronse máis de catorce toneladas de marisco, chegando a acadar un prezo total en lonxa de máis de 92 mil euros.
Precisamente un dato relevante, como nos sinalou o propio patrón maior noiés, foi o prezo acadado polas distintas especies. O berberecho de primeira na pesa rondou os 3’92 euros e o de segunda 2’90. Na máquina esta mesma especie en primeira categoría chegou a cotizarse a 8’70, o de segunda a 5’70, o de terceira, o máis abundante estes días, a 3’54 e o de cuarta a 2’79.
En canto a ameixa a fina de primeira cotizouse a 96’45, a de segunda a 53’65, a de terceira a 19’08 e a de cuarta a 13’60. A ameixa babosa andivo a 12’02 e a xapónica a 7’55. A intención do pósito noiés pasa fundamentalmente por continuar traballando ata o vindeiro 15 de marzo.
A maioría dos mariscadores valoraron moi positivamente estas primeiras xornadas, debido fundamentalmente ó prezo que está a acada-lo marisco en lonxa, lixeiramente superior ó de semanas anteriores. Aínda así afirmaron ter serias dificultades para colle-los topes debido á escaseza de marisco nestes primeiros días de traballo.
Redacción Barbanza
