VALGA > Indignación e tristeza. Eses son os dou sentimentos que amosaron os veciños de Valga 24 horas despois do accidente que segou á vida de tres persoas, dous delas da mesma familia. Mentres a corporación vai esperar ata o sábado para manifestarse, algúns dos habitantes da vila concentráronse nas inmediacións do fatídico paso a nivel. Durante a mañá vivíronse algúns momentos de tensión entre os veciños e os operarios de ADIF que non foron a máis. Sobre todo destaca a convicción das testemuñas que aseguran que as barreiras estaban levantadas.
O que ven na fotografía foi un dos momentos de máis tensión da concentración. Algúns veciños perderon os nervios e tomaron a vía en sinal de protesta polo acontecido nas vías. Foron os familiares dos falecidos os que tiveron que pedir calma e interceder para pedirlles que deixasen a vía libre para que pasase o tren. Foi unha mañá axitada para os veciños do concello.
Queren respostas e solucións. As testemuñas aseguran que as barreiras, en contra dalgunhas versións, estaban levantadas no intre do accidente. Contan que o mal puido ser maior xa que o transporte escolar cruza este paso a nivel varias veces ó día. Para Luís Sanmarco ó accidente para el foi un milagre. O seu vehículo non arrancou e o coche que sufriu a impacto mortal adiantouno no mesmo intre que pasou o tren. 14 pasos a nivel cruzan o concello de Valga e doce de eles sen barreiras.
Os veciños esixen mais medios para evitar mais episodios coma estes. Catro pasos, dous con barreiras e outros dous sen elas, cruzan a parroquia de Campaña.
Condolencias das autoridades
As reaccións dende Madrid e Santiago non se fixeron esperar. O presidente da Xunta, Emilio Pérez Touriño, visitou os fogares das familias dos falecidos para expresar as súas condolencias. A ministra de Fomento, Magdalena Álvarez, tamén estivo en Valga, na parroquia de Setecoros, e asegurou que dende o Ministerio farase todo o posible para esclarecer e paliar esta situación.
Touriño non fixo declaracións pero mais tarde o presidente asegurou en nota de prensa que non se pode nin se debe esperar á culminación da construción do tren de alta velocidade para acabar cos problemas cos pasos a nivel. Tamén pediu o compromiso de Fomento para loitar contra esta situación. A ministra de Fomento suliñou que nestes intres a investigación xa esta aberta e que non se coñecen de momento as causas do suceso.
Magdalena Álvarez lamentou ás declaracións de ADIF nas que se asegura que non houbo ningún fallo no sistema. Pouco despois no Concello, a ministra asegurou que queren colaborar plenamente no esclarecemento dos feitos e amosouse a favor de colaborar có goberno local. A realidade é que de momento o convenio entre Concello e ministerio non está firmado e os avances ata o día de hoxe nesta materia levan parados dende o pasado outubro.
Redacción Salnés
