SANXENXO > Leopoldo Portela, hoxe empresario de éxito, foi cofundador de CC.OO. e un dos maiores activistas a prol da democracia.
Mariñeiro, mineiro, militante comunista e hoxe empresario de éxito en Asturias. José Leopoldo Gondar pode presumir dunha intensa e comprometida vida. Pero ata chegar aquí, foron moitas as necesidades e penurias que viviu e das que ven de deixar constancia nun libro de memorias que presenta na súa vila natal, Portonovo.
‘Memorias de José Leopoldo Portela Gondar’ conta a peripecia vital dun home, que, con 16 anos, marchou de Portononovo na procura dun futuro mellor. Fillo de solteira e con dous irmáns, a súa nai, peixeira, apenas podía darlles de comer, polo que marchou a Asturias para embarcar. Pero alí atopou a un veciño da vila que traballaba nas minas e ficou con el converténdose nun dos picadores máis novos.
Como mineiro e como membro de CC.OO. conseguiu importantes melloras para o sector, un dos seus maiores orgullos. Como militante do Partido Comunista, José Leopoldo loitou moito pola democracia e por un sistema mellor que aínda non atopou. Está moi defraudado coa democracia e en especial coa esquerda, que ‘deixou de lado os ideais’ e tan só persigue os mesmos obxectivos que a dereita.
José Leopoldo Portela presentou as súas memorias en Asturias e o video dese acto poderá verse o venres 1 de xuño na Confraría de Portonovo, onde o autor estará tamén a disposición dos interesados. Precisamente un veciño da vila, Leopoldo González, foi quen lle prestou ó autor moitas das fotos antigas do pobo que se inclúen neste libro de memorias que xa se pode atopar nas librerías e que deixa constancia viva da loita de moitos galegos por construír un país mellor.
Redacción Salnés
